दैलेख (महाबु) । दैलेखको महाबु गाउँपालिकामा कर्मचारी खेलकुद कार्यक्रम आयोजना हुने भएको छ । महाबु कर्मचारी मिलन केन्द्रको आयोजनामा दैलेख जिल्ला अन्तरगत रहेका पालिका स्तरीय कर्मचारीहरुबीच खेलकुद प्रतियोगिता आयोजना गरिएको हो । फागुन १९ गतेसम्म हुने कार्यक्रमको बिहीबार उद्घाटन हुने जनाइएको छ ।
खेलकुद कार्यक्रम अर्तगत पुरुषतर्फ क्रिकेट, ब्याटमिन्टन, स्लो बाइक रेस र महिलातर्फ घैटोफोड प्रतियोगिता समावेश गराइएको मिलन केन्द्रका संयोजक अनिल कुमार पाण्डेले जानकारी दिए ।
उनका अनुसार क्रिकेटतर्फ प्रथमलाई ४० हजार, द्वितीय २० हजार रुपैँया, व्याटमिन्टनतर्फ प्रथमलाई २० हजार, द्वितिय १० हजार रुपैँया, स्लो बाइक रेसमा प्रथमलाई १० हजार, द्वितिय पाँच हजार र तृतीय दुई हजार पाँच सय रुपैँया पुरस्कार छ भने घैटोफोडमा प्रथम पाँच हजार रुपैँया पुरस्कार राशी रहेको छ । सहभागी विजेता खेलाडीलाई मेडल र प्रमाण पत्र समेत प्रदान गरिने जनाइएको छ ।
खेल प्रतियोगितामा दैलेख जिल्ला स्थित स्थानीय तहमा कार्यरत कर्मचारीहरुको सहभागिता हुँदैछ । खेलकुदका माध्यमबाट जिल्लातहमा रहेका कर्मचारीहरुबीच समन्वयकारी भूमिकालाई बढाउन टेवा पुग्ने विश्वास लिइएको छ ।
कार्यक्रम विहान ११ बजे उद्घाटन हुने जनाइएको छ ।
