कर्णाली । सुख्खा पहिरोले मदन भण्डारी राजमार्ग अन्तर्गत दाङ–सल्यान कालिमाटी–सुर्खेत सडक मंगलबार बिहानैदेखि अवरुद्ध भएको छ । सल्यानको कालिमाटी गाउँपालिका -४ टटेलीमा गएको सुख्खा पहिरोले उक्त राजमार्ग अन्तर्गत दाङ–सल्यान कालिमाटी– सुर्खेत सडक अवरुद्ध भएको हो ।
सडक बिहानैदेखि अवरुद्ध भएपछि सुर्खेतबाट सल्यानको कालिमाटी हुँदै तुलसिपुर जाने र दाङको तुलसीपुरबाट सुर्खेत जाने यात्रुहरु बीचैमा अलपत्र परेका छन् । नजिकका यात्रुहरु भने हिँडेर आउजाउ गर्न बाध्य छन् ।
सुख्खा पहिरोले बिहानैदेखि सडक अवरुद्ध भएपछि अहिले सुरक्षाकर्मीको टोली पुगेर पहिरो हटाउने काम भइरहेको जिल्ला प्रहरी कार्यालय सल्यानका सूचना अधिकारी प्रनि रेशमबहादुर खत्रीले बताए । सडक निर्माणमा प्रयोग गरेको डोजर, एस्काभेरका कारण टटेलीमा वर्षापछि मात्र नभई बेलाबेलामा सुख्खा पहिरोले जाने गरेको र यात्रुलाई दुःख दिने गरेको उनले जानकारी गराए । ।