सल्यान । सल्यानमा अटो दुर्घटना हुँदा तीन जना घाइते भएका छन । सल्लीबजार–चौरजहारी सडकखण्ड अन्तर्गत जिल्लाको बन्गाड कुपिण्डे नगरपालिका-१, रानागाउँ नजिकै चिउराबाट सल्लीबजार आउँदै गरेको भे १ ह २२२४ नम्बरको अटो आइतबार दिउँसो १२ बजे दुर्घटनामा परेको हो ।
अटो दुर्घटना हुँदा बन्गाड कुपिण्डे नगरपालिका ५ की वर्ष ३६ की लीला राना, वर्ष १९ की कोकिला विष्ट, कुमाख गाउँपालिका ५ घर भई हाल वडा नं ५ बस्ने अमृता रावत घाइते भएको जिल्ला प्रहरी कार्यालय सल्यानका सूचना अधिकारी तथा प्रहरी प्रवक्ता प्रहरी निरिक्षक गोपाल श्रेष्ठले बताए ।
अटो दुर्घटनामा परी घाइते भएका तीन जनाको स्थानीय तथा सुरक्षाकर्मीद्वारा उद्धार गरिएको र अहिले सल्लीबजारस्थित संजिवनी अस्पतालमा उपचार भैरहेको प्रनि श्रेष्ठले जानकारी गराए ।
उनका अनुसार अटो अनियन्त्रित भएर दुर्घटनामा परेको थियो । अटो सडकदेखि ३ मिटर तल खसेको थियो । अटोमा सानो बच्चासहित ६ जना सवार थिए । अटो चालक भने दुर्घटनापछि फरार रहेका छन् ।