काठमाडौं । नेकपा एमालेका सांसद रघुजी पन्तले प्रधानमन्त्री पुष्पकमल दाहाल प्रचण्डका अभिव्यक्तिले देश रोएको बताएका छन्।
बुधबार प्रतिनिधिसभाको बैठकमा समय लिएर बोल्दै सांसद पन्तले प्रधानमन्त्री प्रचण्डका अभिव्यक्तिले देश रोएको बताएका हुन्। उनले प्रधानमन्त्रीलाई सम्बोधन गर्दा ‘सम्माननीय’ भन्न पनि मन नलागेको बताए।
‘आज मौसम मात्र उदास छैन । मौसममा मात्रै बादल लागेको छैन। नेपालीको स्वाभिमानमा आघात पुर्याएको छ। सम्माननीय प्रधानमन्त्रीज्यू। सम्माननीय पनि भनौं कि नभनौं जस्तो लाग्छ कहिलेकाँही। तर, सम्झिन्छु। हामीले नै उहाँलाई प्रधानमन्त्री बनाएका थियौं। उहाँले दिएका अभिव्यक्तिले हाम्रो मनमा बादल लागेको छ। नेपाल रोएको छ। नेपालको स्वाभिमान गिरेको छ। नेपालको प्रधानमन्त्री बनाउन जनतातिर फर्किने कि दिल्ली जाने हो? नेपालको प्रधानमन्त्री बनाउन दिल्ली जानुपर्ने?,’ उनले प्रश्न गरेका छन्।