कर्णाली । कर्णालीका आठ स्थानमा शान्तिपुर्ण रुपमा मतदान भइरहेको छ । कर्णाली प्रदेशअन्तर्गत नगरपालिका उपप्रमुख एक, गाउँपालिका अध्यक्ष एक, गाउँपालिका उपाध्यक्ष एक र पाँच वडाध्यक्ष गरी आठ पदका लागि मतदान भइरहेको हो ।
बिहान ७ बजेदेखि सबै मतदान केन्द्रमा शान्तिपूर्ण रुपमा मतदान भइरहेको कर्णाली प्रदेश प्रहरी कार्यालय सुर्खेतले जनाएको छ । चिसोको कारण उम्मेदवारका एजेण्टहरू ढिलो गरी मतदानस्थलमा आउँदा हिमाली जिल्ला हुम्लामा मात्रै मतदान कार्य निर्धारित समयभन्दा ढिलो गरी सुरु भएको थियो ।
दैलेखको महावु गाउँपालिका अध्यक्ष, जाजरकोटको नलगाड नगरपालिका उपप्रमुख र हुम्लाको सर्केगाड गाउँपालिका उपाध्यक्ष पदका लागि मतदान जारी छ । दैलेखको दुल्लु नगरपालिका–१३, कालिकोटको तिलागुफा–४, जाजरकोटको कुशे गाउँपालिका–७, डोल्पाको त्रिपुरासुन्दरी नगरपालिका–५ र रुकुमपश्चिमको सानोभेरी नगरपालिका–५ मा वडाअध्यक्ष पदको मतदान भइरहेको छ। उपनिर्वाचनमा ४३ जना उम्मेदवार चुनावी मैदानमा छन् ।
