काठमाडौं। काठमाडौं विश्वविद्यालय (केयू)का कार्यक्रमहरू भारतका विभिन्न सहरका शैक्षिक संस्थामा सञ्चालनका लागि अध्ययन सुरु भएको छ ।

काठमाडौं विश्वविद्यालयको अन्तर्राष्ट्रियकरण अभियानअन्तर्गत योगिक साइन्स, हेल्थ मेनेजमेन्ट, हस्पिटालिटि मेनेजमेन्टलगायतका कार्यक्रमहरू भारतीय शहरहरूमा संचालन गर्ने सम्भाव्यताका लागि तयारी भएको हो ।

सम्भाव्यता अध्ययनका लागि आन्द्र प्रदेशको तिरुपतीस्थित विश्वेश्वरा योग रिसर्च इन्ष्टिच्युटसँग लेटर अफ इन्टेन्ड अर्थात आशय–पत्रमा बुधबार हस्ताक्षर भएको छ ।

शिक्षा, विज्ञान तथा प्रविधिमन्त्री तथा विश्वविद्यालयका सहकुलपति देवेन्द्र पौडेल र केयूका उपकुलपति प्राडा। भोला थापाका उपस्थितिमा सहमति–पत्रमा तिरुपतिमा हस्ताक्षर भएको हो ।

बुधबार भएको समझदारी–पत्रमा केयुको अन्तर्रास्ट्रिय सम्बन्ध महाशाखाका प्रमुख डा। उद्धव प्याकुरेल र विश्वेश्वरा योग रिसर्च इन्ष्टिच्युटस् कि सचिव डा। एन श्रीदेविको हस्ताक्षर छ ।

केयूको टिम तिरुपति पुगेर हस्ताक्षर गरेको छ । मन्त्रीको नेतृत्वमा उपहुलपतिसहितको टिम भारत पुगेर विभिन्न शैक्षिक संस्थासंग सम्झौता गरेको छ ।

यसअघि भारतको मद्रासस्थित आइआइटी र  केयुले संयुक्त डिग्री दिने गरी सुरु गरेको स्नातकोत्तरस्तरको एमटेक इन इनर्जी सिष्टम कार्यक्रमका विद्यार्थीको अध्यापन,  इन्टर्नसीपलगायतका सुबिधा उपलब्ध गराउनेबारे डिफिनिटिभ  समझदारी–पत्र गत सोमबार हस्तान्तरण भएको थियो ।

केयु र आइआइटीकाबीच भारतका प्रधानमन्त्री नरेन्द्र मोदीको गत मेमा भएको नेपाल भ्रमणका वेला दुई देशका प्रमको रोहवरमा सो विषयको संयुक्त कार्यक्रम संचालनबारे सम्झौता भएको थियो ।

मन्त्री तथा सहकुलपति देवेन्द्र पौडेलले यसरी कार्यक्रम विस्तार गर्दा आउन सक्ने चुनौतीहरूको सहजिकरणमा सरकारले सहयोग गर्ने बताए । सहकुलपतिको नेतृत्वमा उपकुलपति, प्राध्यापक विवेक बरालसहितका केयु टिमले सोमबार नै चेन्नाइस्थित मद्रास डाइवेटिक रिसर्च सेन्टरसँग डाइवेटोलोटीमा संयुक्त विधावारिधि कार्यक्रम संचालनको संभावनाबारे छलफल गरेको थियो ।